ундан қутулиш фақат имон, эътиқодимизга боғлиқ

Коррупцияга оид ҳуқуқбузарликларни ўз вақтида аниқлаш ва уларга чек қўйиш, сабаб ва оқибатларини бартараф этиш, жиноятга жазо муқаррарлиги принципини таъминлаш ниҳоятда масъулиятли вазифа. Ўзбекистон Республикаси Президентининг 2017 йил 3 январда имзолаган "Коррупцияга қарши курашиш тўғрисида"ги қонунда бу борада давлат сиёсатининг асосий йўналишлари белгилаб берилган.
Хусусан, аҳолининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш, давлат ва жамият ҳаётининг барча соҳаларида коррупциянинг олдини олишга доир чора-тадбирларни амалга ошириш бу иллатни бартараф этишда асосий омил эканлиги кўрсатилган. Хуқуқий онг, ҳуқуқий маданиятни юксалтириш масаласида узлуксиз ва самарали тарғибот билан аҳолини қонунга ҳурмат руҳида тарбиялаш, ўз ҳуқуқ ва бурчларини англатиш орқали шахсни камол топтириш мақсад қилинади. Қонуннинг 3-моддасида "Коррупция - шахснинг ўз мансаб ёки хизмат мавқеидан шахсий манфаатларини ёхуд ўзга шахсларнинг манфаатларини кўзлаб моддий ёки номоддий наф олиш мақсадида қонунга хилоф равишда фойдаланиши, худди шунингдек, бундай нафни қонунга хилоф равишда тақдим этиш" деб таъриф берилган.
Айтиш жоизки, барча иллатлар каби коррупция ҳам ўзига қулай бўлган муҳитда жуда тез урчийди.
Афсуски, бу борада кўп одамларда коррупцияга мойиллик устун. Бу нафақат баднияту жиноятчиларда, балки оддий одамларда ҳам кўзга ташланади. Устунлик шундаки, арзимаган совға ёки пул эвазига шифокорлар беморларга яхшироқ қарашига, сифатли хизмат кўрсатилишига, бизнесини сердаромад қилишига эришиши мумкин. Қонуний ҳуқуқини талаб қилишга қараганда бу улар учун анча қулай кўринади. Хўш энди айтингчи, биз ўзимиз қонун-қоидаларга бўйсунишни истамас эканмиз, ахир қандай қилиб, коррупциядан халос бўламиз?! Шунинг учун келишувга эш бўлган бу иллатдан қутулиш, унга қарши кескин курашишда ўз имон, эътиқодимизга таянган ҳолда иш олиб борсакгина кўзлаган мақсадимизга эришамиз.

Гулноза АҲРОРОВА,
туман молия бўлими бош юристконсульти